Enric Mas di adeus ao Tour na primeira etapa por unha caída
Enric Mas di adeus ao Tour na primeira etapa por unha caída
Carapaz chegou á meta pero non sairá na segunda etapa, por mor da mesma caída
Adam Yates gañoulle en Bilbao ao seu irmán Simon
Pogaçar foi o terceiro e rabuñou os primeiros segundos
Este Tour, promete. Bastaron os primeiros 182 quilómetros da etapa inicial Bilbao-Bilbao, para poñer a carreira patas arriba.
O pelotón saíu inquedo e rapidamente cinco homes se deron á fuga, entre eles tres franceses, que endexamais chegaron acadar máis de dous minutos de diferenza e a súa aventura morreu a cincuenta quilómetros da meta.
Pouco despois, caían dous dos homes fortes da carreira: Richard Carapaz e un dos firmes candidatos o podio, o español Enric Más, que non puido continuar e acabou abandonando, coma lle sucedera o ano pasado por culpa do Covid.
Mentres, o ecuatoriano lograba recuperarse e chegar á meta con 15 minutos e 24 segundos de retraso.
As sorpresas non remataron aí. A falta de dez quilómetros, Pogacar decide probar os seus rivais. Seguiuno Vingegaard. E tamén os irmáns Yates. Adam, compañeiro de equipo de Pogacar no Emirates, e Simon, do Jayco.
A alianza entrambos lévaos a unha fuga na que toman doce segundos de vantaxe a falta de cinco quilómetros, distancia que lograrán manter na liña de chegada na que se impón Adam, con catro segundos de vantaxe sobre o seu irmán e doce sobre os homes importantes do pelotón.
Un grupo encabezado por Pogacar, que aproveitou a bonificación do terceiro posto para meterlle catro segundos a Vingegaard, o seu gran rival polo triunfo final. Mentres tanto, Adam Yates enfundábase o primeiro xersei amarelo.
