España activa o Plan marítimo nacional tras o choque de dous barcos en Xibraltar
España activa o Plan marítimo nacional tras o choque de dous barcos en Xibraltar
![](https://img-g24-crtvg.flumotion.com/prog24/2022/20220830/choquebarcosxibraltar.jpg)
A Capitanía Marítima de Alxeciras activou este martes o Plan marítimo nacional como consecuencia do choque de dous barcos onte á noite fronte a Xibraltar, que obrigou as autoridades da rocha a varar de forma intencionada o VOS 35, o buque que resultou danado.
Segundo informaron fontes do Ministerio de Transportes, Mobilidade e Axenda Urbana, a activación deste plan supuxo a intervención de efectivos de Salvamento Marítimo para prestar colaboración ás autoridades xibraltareñas, que están a dirixir as actuacións de seguridade tras o accidente.
En concreto, Salvamento Marítimo desprazou ata a zona as embarcacións Salvamar Denébola, o buque Luz de Mar e o helicóptero Helimer 222, que manteñen labores de vixilancia, á vez que Xibraltar dispuxo de 400 metros de barreira anticontaminación para despregalas ante unha posible vertedura.
O buque está cargado con 183 toneladas de fuel óleo pesado, 250 toneladas de gasóleo e 27 toneladas de aceite lubricante e estaba a saír de Xibraltar para dirixirse a Vlissingen, nos Países Baixos, cando chocou levemente con outra embarcación.
Ante o risco de afundimento, Xibraltar conduciuno á cara leste da rocha, onde foi varado e a súa proa xa está mergullada 1,2 metros no leito mariño areoso, como medida para evitar danos ambientais.
Esta tarde espérase a chegada dun equipo de expertos de Salvamento de Países Baixos, que se encargará de avaliar o estado do buque e de determinar as actuacións para levar a cabo.