España celebra o Día Nacional do Orgullo LGTBI+
España celebra o Día Nacional do Orgullo LGTBI+
A declaración institucional do Goberno di que o Orgullo LGTBI+ é tamén o "orgullo de España" e dunha "sociedade inclusiva, respectuosa, que valora a diferenza como base da nosa riqueza"
O Goberno anima a toda a cidadanía a sumarse este mércores á celebración do Día Nacional do Orgullo LGTBI+ para "compartir a celebración da liberdade e a diversidade que non exclúe a ninguén".
Foi nunha declaración institucional aprobada polo Consello de Ministros.
A voceira do Executivo Isabel Rodríguez reiterou o compromiso do Goberno coas persoas do colectivo LGTBI+ e advertiu que combaterá os discursos de odio "coa forza do Estado e da lexislación".
"Queremos que os seus dereitos sexan reais e efectivos, que se logre unha verdadeira erradicación da discriminación por orientación sexual, identidade ou expresión de xénero", manifestou Rodríguez.
Na declaración institucional, o Executivo asegura: "O Orgullo LGTBI+ é tamén o orgullo de España e dunha sociedade inclusiva, respectuosa e que valora a diferenza como base da nosa riqueza".
"O Orgullo é unha ferramenta imprescindible de toda a sociedade para alcanzar a igualdade real e efectiva", defende o texto, en que con todo se recoñece que as persoas LGTBI+ "seguen sufrindo intolerables niveis de violencia", ademais de acoso, discriminación, invisibilidade, falta de referentes e delitos de odio.
"Debemos vivir nunha revolta permanente contra a discriminación e a inxustiza, contra a intolerancia e contra os privilexios de quen quere construír un mundo que exclúe a quen non encaixe na súa visión do mesmo", reza a declaración.
Un millón de asistentes e 46 carrozas participarán este sábado no Orgullo en Madrid
A capital española prevé este ano un millón de asistentes á gran celebración do Orgullo. Son 300.000 persoas máis que en 2022.
A marcha comezará ás 19:00 horas na glorieta de Carlos V e discorrerá ata a praza de Colón, cunha parte a pé e, a continuación, outra "rodada" con 46 carrozas.
O delegado do Goberno na comunidade autónoma, Francisco Martín, chamou a que estas "festas reivindicativas", que se celebrarán con actos desde o mércores, 28 de xuño, ata o domingo, 2 de xullo, sirvan como mostra de "tolerancia", de "respecto á diversidade" e como "unha magnífica xanela para volver ensinar ao exterior o mellor do que somos e o que temos".
O lema que irá na pancarta de cabeza da marcha será: "Polos nosos dereitos, polas nosas vidas, con orgullo".
"Non vou entrar a valorar a quen quere cernar a democracia e tirar os dereitos do colectivo LGTBI+, do colectivo de mulleres e do colectivo de migrantes ao lixo", dixo a presidenta da Federación Estatal LGTBI+ Uge Sangil, en referencia á lona despregada por Vox en Madrid.
