Tres anos do asasinato de Samuel Luíz na Coruña, co xuízo previsto para outubro
Tres anos do asasinato de Samuel Luíz na Coruña, co xuízo previsto para outubro
A asociación LGTBI+ALAS convocou unha vixilia no lugar en que o mataron
O xuízo comezará o 16 de outubro
Terceiro aniversario do asasinato do mozo Samuel Luíz nas rúas da Coruña.
Hai uns minutos, centos de persoas de todas as idades rompían cos seus aplausos o minuto de silencio que convocou para lembrar a Samuel a asociación LGTBI+ALAS a carón do lugar onde o mataron, unha coñecida discoteca de Riazor. Esta asociación vai exercer de acusación popular no xuízo contra os cinco presuntos asasinos que comezará en outubro.
A noite do 2 ao 3 de xullo de 2021, na saída dese local de lecer nocturno, un grupo de mozos atacou a Samuel Luíz, de 24 anos, e mallaron nel ata matalo. Os esforzos de dous cidadáns senegaleses por parar a pelexa foron inútiles.
O suceso, que os cidadáns lembran moi ben, aínda mantén conmocionada a poboación, que agarda que nunca máis se volvan repetir actos semellantes.
A investigación levou a deter unha muller, considerada a instigadora, e seis varóns como supostos participantes. Dous son menores de idade, que, condenados tras un acordo coa Fiscalía, están a piques de rematar o tempo de internamento.
A Fiscalía pide para os adultos condenas que van dos 22 aos 27 anos de cadea, no xuízo con xurado popular que comezará o 16 de outubro e que se prevé que finalice o 18 de novembro.
