España, entre os países europeos onde hai máis reclamacións de consumo

"Eu reclamo, reclamo e pido os cartos de volta, nin máis nin menos", comenta unha señora.

Reclamar é un dereito, pero non todos os consumidores pensan que sexa o mellor camiño.

"Non adoito facer reclamacións", apunta outra.

"A maioría das veces creo que caen en saco roto que non serve de moito reclamar e que tardan un tempo superior ao que ti agardas, entón ao final non serve de nada", indica unha rapaza nova.

"Méteste nun labirinto que non sabes cando vai rematar e se vai chegar a bo porto para ti, ao mellor sáeche logo máis caro reclamar", conta un señor.

"Preséntase sempre como algo moi longo e non moi doado de facer, e moitas veces é doado, é cuestión de poñerse", fala un rapaz.

 "De feito eu vou á oficina de Consumo e xa fixen tres reclamacións de Movistar e devolvéronme os cartos".

Segundo datos facilitados polo Centro Europeo do Consumidor, un organismo que depende do ministerio, cada vez son máis os españois que se animan a facer valer os seus dereitos. Por sectores, o transporte aéreo recibe unha de cada cinco queixas.

"Eu creo que a maior cantidade de reclamacións que fixen foi aí e funciona fatal, ou sexa grandes corporacións españolas de compañías aéreas, de reclamar en non contestar en dous meses, iso fatal e despois moitas veces, electricidade, auga, teléfono, servizos básicos", denuncia unha moza.

Dende xuño, o Ministerio de Consumo puxo a disposición da cidadanía unha caixa de correos en liña para atender denuncias por infraccións masivas para non atascar aínda máis os xulgados.

 "Creo que se nós fixeramos a nosa parte de defendernos primeiro, loitar polos nosos dereitos isto iría mellor, bastante mellor", sentenza unha muller.