España evacúa a máis de 30 nacionais do Sudán
España evacúa a máis de 30 nacionais do Sudán
Dous avións A400M do Exército do Aire trasladan a Djibuti máis dun cento de españois, sudaneses e cidadáns doutros países europeos e de América Latina
Na operación participaron preto de 200 militares
Cidadáns franceses e europeos evacuados nun A400M de Francia desembarcan en Djibuti
España evacuou máis dunha trintena de nacionais do Sudán. Dous avións A400 M sacáronos do país africano, que vive un enfrontamento entre o exército e os paramilitares desde o pasado día 15. Contra as 23:00 hora galega, saíron da capital con rumbo a Djibuti, segundo confirmaron no Goberno.
Canda aos españois viaxan cidadáns sudaneses, doutros catro países europeos e da Arxentina, Venezuela, México e Colombia.
"Acaban de engalar en Khartum os avións do Exército do Aire cos nosos cidadáns e da Embaixada de España no Sudán a bordo. Tamén viaxan outros cidadáns europeos e latinoamericanos. Ningún incidente no traslado do noso convoi", publicou o ministro Albares na rede social Twitter.
O Ministerio de Defensa enviou vehículos blindados RG-31 e efectivos de operacións especiais, que escoltaron o convoi de evacuados.
Está previsto que desde Djibuti sexan trasladados a España nun avión de transporte A320.
Un grupo de españois decidiu quedar no Sudán ou abandonalo pola súa conta. Outros xa marcharan cando as autoridades activaron esta operación.
