España supera os 49 millóns de habitantes grazas ao aumento da poboación estranxeira

A poboación de España superou os 49 millóns de habitantes -49.077.984 ao 1 de xaneiro de 2025- grazas ao aumento de estranxeiros, xa que diminuíron as persoas nadas en España.

Segundo a Estatística Continua de Poboación, que publica o Instituto Nacional de Estatística (INE), trátase do valor máximo da serie histórica, alcanzado tras o aumento en 115.612 persoas do cuarto trimestre. En termos anuais, o crecemento poboacional estimado foi de 458.289 persoas.

As principais nacionalidades dos inmigrantes que se sumaron á poboación española foron a colombiana, a venezolana e a marroquí.

O número de estranxeiros aumentou no último trimestre en 100.793 persoas, ata 6.852.348, mentres que a poboación de nacionalidade española creceu en 14.819 persoas.

Ao 1 de xaneiro, o número de fogares situouse en 19.425.559, cun aumento de 33.401.

Os maiores aumentos de poboación por comunidades

A poboación creceu en todas as comunidades respecto ao trimestre anterior; os maiores crecementos déronse en Melilla (0,57 %), Comunidade Valenciana (0,47 %), Madrid (0,44 %) e Cataluña (0,34 %); séguenlle, A Rioxa (0,29 %) e Murcia (0,28 %).

Por baixo da media (0,24 %) están Navarra (0,21 %), Castela-A Mancha (0,17 %), Asturias (0,15 %), e Galicia, Canarias e Castela e León (con 0,14 %).

Rexistraron un menor crecemento, Estremadura (0,02), Aragón (0,03), Andalucía (0,04), Ceuta (0,05), Baleares (0,07), País Vasco (0,12) e Cantabria (0,13).

Migracións exteriores

As principais nacionalidades dos inmigrantes no último trimestre do ano foron a colombiana (con 43.400 chegadas a España), a venezolana (30.500) e a marroquí (27.700).

Respecto aos estranxeiros que abandonaron España, destacan os de nacionalidade marroquí (con 12.300 saídas), colombiana (11.900) e romanesa (9.900). 

Galicia suma case 4.000 habitantes grazas ao aumento de poboación estranxeira

Galicia sumou case catro mil habitantes (3.821) no último trimestre de 2024, ao 1 de xaneiro de 2025, ata 2.715.424 persoas, un 0,14 % -unha décima inferior á media-, grazas ao aumento de estranxeiros, xa que diminuíron as persoas nadas en España.

En Galicia vivían 172.523 persoas con nacionalidade estranxeira ao 1 de xaneiro de 2025; mentres que ao 1 de outubro de 2024 vivían 166.99 persoas cunha nacionalidade distinta á española, segundo a estatística.