Estabilizado o incendio da Gudiña, controlado o da Mezquita e extinguido o de Palas de Rei
Estabilizado o incendio da Gudiña, controlado o da Mezquita e extinguido o de Palas de Rei
O incendio de Pentes-A Gudiña, estabilizado, afecta 280 hectáreas
Medio Rural dá tamén por extinguido o incendio de Augasantas, en Cerdedo-Cotobade, que queimou 13,88 hectáreas
Incendio forestal na parroquia de Cuíña, Palas de Rei (Garda Civil)
A Consellería do Medio Rural deu por estabilizado ás 20.12 horas deste xoves o incendio forestal da parroquia de Pentes, na Gudiña (Ourense), que ata o momento arrasou unhas 280 hectáreas.
Este lume iniciouse o luns ao mediodía e, aínda que se deu por controlado, na tarde do mércores reactivouse. Na súa extinción traballaron ata o de agora 26 axentes, 53 brigadas, 27 motobombas, seis pas, catro técnicos, 11 helicópteros e 10 avións, así como medios portugueses, porque as chamas están preto da fronteira.
Mentres tanto, tamén na Gudiña, pero na parroquia de Barxa, continúa estabilizado outro incendio forestal que empezou na medianoite do luns ao martes.
Leva arrasadas outras 90 hectáreas e mobilizáronse ata o momento 17 axentes, 30 brigadas, 13 motobombas, dúas pas, catro técnicos, oito helicópteros e oito avións, xunto con medios terrestres portugueses.
Controlado o incendio na Mezquita
Ademais, o incendio da Mezquita (Ourense) que empezaba á primeira hora da tarde deste xoves está controlado desde as 20.16 horas. Segundo as últimas estimacións, afecta a unhas 40 hectáreas. Ata o de agora traballaron catro axentes, 10 brigadas, catro motobombas, dúas pas, dous técnicos, sete helicópteros e seis avións.
En canto ao incendio que empezaba na noite do mércores en Palas de Rei (Lugo), na parroquia de Cuíña, a Xunta deuno por extinguido sobre as 20.20 horas deste xoves. Calcinou 36,66 hectáreas: 31,16 de monte raso e 5,5 de arboledo. No seu apagado mobilizáronse 16 axentes, 21 brigadas, 23 motobombas e unha pa.
Mentres tanto, segue controlado desde a noite do mércores o de Chandrexa de Queixa (Ourense), na parroquia de Requeixo, que leva calcinadas outras 40 hectáreas.
Incendio forestal na Gudiña.
Mentres, segue estabilizado o lume que afecta a parroquia de Barxa, tamén na Gudiña, e que se iniciou a medianoite do martes. O lume afecta a unhas 90 hectáreas e na súa extinción participaron ata o de agora 17 axentes, 28 brigadas, 11 motobombas, 2 pas, 4 técnicos, 8 helicópteros e 8 avións, ademais de medios portugueses.
Finalmente, Medio Rural dá por extinguido o incendio declarado na tarde do martes en Cerdedo-Cotobade, na parroquia de Augasantas, e que afectou a algo menos de 14 hectáreas. Así mesmo, dá por controlado o incendio rexistrado na parroquia de Requeixo, en Chandrexa de Queixa, iniciado o martes e que afectou a 40 hectáreas.
