Evitan un transplante a unha nena dun ano cun corazón artificial nun hospital da Coruña

Un equipo médico do Complexo Hospitalario Universitario da Coruña (CHUAC) levou a cabo con éxito, por primeira vez en España, a recuperación total do corazón dunha nena de 1 ano implantando temporalmente un artificial de última xeración, informa o Sergas, xestor de hospitais e centros públicos de saúde de Galicia,

A paciente sufría unha miocardite fulminante por infección vírica e os médicos lograron recuperar a función miocárdica mediante o uso dun corazón artificial de longa duración e evitando a alternativa do transplante, precisa Sergas, e apunta que é o primeiro caso deste tipo rexistrado en España.

Este tipo de infeccións con afección cardíaca e presentación fulminante son moi pouco frecuentes, cunha incidencia estimada dun caso por cada 100.000 pacientes.

A nena ingresou na unidade de coidados intensivos pediátrica do CHUAC, onde o equipo médico decidiu implantar un dispositivo de asistencia mecánica circulatoria e respiratoria capaz de proporcionar soporte cardíaco e pulmonar.

Como a función do corazón non melloraba, indica Sergas, os médicos recorreron a implantar un corazón artificial extracorpóreo de longa duración e dous meses despois empezouse a apreciar unha progresiva melloría.

Os médicos estableceron un protocolo de "desconexión progresiva do corazón artificial" para avaliar a función cardíaca da paciente e, tras obter información positiva, decidiron "retirar a máquina", indica o cirurxián Carlos Velasco, quen asegura que a nena "poderá levar unha vida totalmente normal".

O Berlin Heart é un dispositivo que pesa uns 250 gramos e que vai colocado no abdome do menor para bombear sangue desde o ventrículo esquerdo do corazón e de aí cara á aorta.

Este dispositivo de asistencia cardíaca obriga o paciente a permanecer ingresado no hospital, xa que require uns coidados e un manexo moi específico.