Evolución boa do incendio de Arbo, que aínda non está controlado

A evolución do incendio de Arbo é boa, pero aínda non está controlado tecnicamente. O alcalde considera que aínda cómpre extremar as precaucións porque hai vento e agárdanse temperaturas elevadas.

Os veciños consideran que o peor xa pasou. Temeron por vivendas e núcleos, pero o lume só afectou a monte e a algunhas vides. Son xa 400 hectáreas. 

O lume afectou ás parroquias de Mourentán, centro de Arbo e Cabeiras. Medios aéreos refrescaban diversas zonas esta mañá, a UME facíao a pé de campo, ata unha empresa particular abriu devasas esta noite.

As causas do lume estanse a investigar, pero o alcalde considera a título persoal que foi intencionado porque prendeu ás dúas da madrugada nunha zona de monte. O rexedor tamén agradeceu o apoio de todas as administracións e medios de extinción.