Exemplares cruzados de xabaril e porco doméstico preocupan os agricultores da Estrada

Os agricultores da Estrada están afeitos aos ataques do xabaril. Pero esta foto, feita a pasada semana pasada na parroquia do Cereixo, fixo saltar as alarmas. O xabaril puido cruzarse con algún porco criado ao aire libre ou fuxido dalgunha granxa.

"Parece un híbrido, como un porco pero coas orellas en punta e o fociño dun xabaril", explica unha veciña.

"Os que eu vin creo que non eran cruzados, eran totalmente negros. Agora ben, podería ser que os houbera cruzados porque o país é grande, andan moitos quilómetros e non é fácil controlalos", comenta o propietario da leira atacada.

O problema dos cruzamentos é que fan os mesmos estragos, pero reprodúcense a maior velocidade. Ao ser medio porcos teñen máis crías, unhas 10 ou 12, fronte ás 4 ou 5 dun xabaril. Híbridos ou non, para Albino, o dono da leira, o problema é que os ataques van a máis.

"Antes vías unha parella de xabarís e se os corrías non regresaban. Agora está cheo, non teñen medo e non deixan nada",  lamenta Albino.

O seu terreo esta totalmente fozado na zona da herba e tivo que poñer pastor eléctrico para na parte onde ten as patacas e o millo. Canda el, moitos gandeiros da zona tiveron que poñer fíos electricos para protexer as forraxes.

"Isto é a España baleirada, non se pode, todo isto ten un custo e despois non sacamos os cartos para mantelo", engade Albino.

Piden que as administracións tomen medidas que permitan un equilibrio entre a agricultura e a fauna salvaxe. Mentres, os pastores eléctricos e a continua vixilancia son os métodos para espantar o xabaril.