Éxito da LVIII Festa do Xamón da Cañiza: contan con superar as dez mil racións

Detrás dun prato de xamón hai moita historia.

Os fenicios foron os responsables de traer os primeiros porcos á península ibérica, e tras deles, romanos e íberos deron boa conta dos animais con métodos de conservación que chegan ata os nosos días. O máis coñecido, o xamón curado en sal.

O lugar de Galicia que máis sabe de xamóns é A Cañiza onde celebran este 15 de agosto a festa de exhaltación. 

Os xamóns de porco celta criados e alimentados en Galicia con castañas e landras eran moi aprezados na primeira metade do século XX polos productores de Guijuelo ou Jabugo.

Primeiro os arrieiros e logo o ferrocarril e o barco fixérono chegar ao resto da península, mesmo aos emigrantes de Latinoamérica.

Moitos deles volven ano tras ano á Festa do Xamón da Cañiza na busca dese sabor de antano.

Foron tantos os visitantes que a organización calcula superar as dez mil racións de carne do ano pasado en diversas preparacións: xamón asado, curado, en tortilla, en empanada e, como novidade deste ano,  as croquetas de xamón.

Para que ninguén quedase sen el, aí estaban os 8 cortadores profesionais do IX Concurso Nacional, coa novidade do premio ao mellor de Galicia, cun nivel altísimo segundo a organización.

Para ser un bo cortador din que cómpre ter paciencia e dedicarlle moitas horas.

Un xamón cortado a coitelo na medida xusta é unha exquisitez. Pero cal é a perfección? Dínolo Víctor Burgos, organizador do concurso.

"O lisco perfecto é o ancho da peza do xamón e entre 3,5-4 cms porque así o lisco queda cubrindo toda a lingua e cómpre non mastigar ata que se quece o touciño, para quitarlle todo o sabor".

Roberto Domínguez, cortador de xamón de Ponteareas, chámalle a iso:

"Tamaño tarxeta é o lisco perfecto"

En Tarragona deron cun xamón fosilizado de case dous mil anos. Non teñan coidado. Os da festa da Cañiza non chegan, seguramente, nin ao venres.