Falece Ignacio Bayón, exministro de Industria con Suárez e Calvo-Sotelo
Falece Ignacio Bayón, exministro de Industria con Suárez e Calvo-Sotelo
No 2015 o Padroado da Fundación de Axuda contra a Drogadicción (FAD) nomeouno presidente da institución
Foi presidente de Citroën Hispania e no 1997 recolleu a Medalla de Ouro de Galicia concedida á empresa
O que fora ministro de Industria e Enerxía con Adolfo Suárez e Leopoldo Calvo-Sotelo entre 1980 e 1982, Ignacio Bayón, faleceu aos 80 anos, segundo informa este sábado a Real Academia de Gastronomía (RAG) da que formaba parte.
No seu comunicado, a RAG lamenta a perda dun dos seus "máis queridos e comprometidos académicos" así como dun "brillante profesional" que foi, ademais, letrado do Consello de Estado e das Cortes Xerais e tivo unha dilatada carreira no ámbito empresarial.
Ignacio Bayón (Madrid, 1944) licenciouse en Dereito con premio extraordinario pola Universidade Complutense de Madrid en 1965 e doutorouse anos máis tarde co mesmo recoñecemento.
Ingresou, por oposición, primeiro no Corpo de Letrados do Consello de Estado e, despois, no das Cortes Españolas, traballando principalmente na Comisión de Obras Públicas.
Estivo nos consellos de administración de compañías como Nestlé, Canal Plus, Repsol, Telefónica, FCC, o Instituto Nacional de Industria (INI) e o Instituto de Crédito Oficial (ICO).
Medalla de Galicia
Ademais, ocupou a presidencia de Renfe, Espasa Calpe, Realia, o grupo alimentario Omsa e Citroën Hispania. Cando ocupaba o cargo nesta última, recolleu a Medalla de Ouro de Galicia concedida á empresa.
En 2015, o Padroado da Fundación de Axuda contra a Drogadicción (FAD) nomeou a Bayón presidente da institución, tras a dimisión de José Angel Sánchez Asiaín por motivos de saúde.
Momento no que recolle a Medalla de Ouro de Galicia no 1997
