Falece un home de 73 anos en Cenlle pola colisión entre un camión e un turismo
Falece un home de 73 anos en Cenlle pola colisión entre un camión e un turismo
O sinistro produciuse pasadas ás 13:00 horas na Autovía das Rías Baixas, A-52, á altura do quilómetro 241
Un home de 73 anos faleceu este mércores tras bater o vehículo que conducía contra un camión na autovía A-52, á altura do termo municipal do Cenlle, segundo informan o 112 Galicia, a Garda Civil e Urxencias Sanitarias 061.
O sinistro ocorreu sobre as 13:05 horas, no quilómetro 241 da autovía en sentido Ourense, e foi un particular o que alertou a Emerxencias. O CIAE 112 Galicia deu aviso ao 061, aos bombeiros do Carballiño, ao GES de Ribadavia, á Garda Civil de Tráfico e aos servizos de mantemento da vía.
Segundo informaban as persoas que deron o aviso, produciuse unha colisión frontolateral entre un camión e un todoterreo, de maneira que este último recibiu o impacto no lado do condutor.
Os bombeiros tiveron que liberar a vítima, cuxo falecemento foi confirmado polos servizos sanitarios. O 061 trasladou ao lugar unha ambulancia e mobilizou o helicóptero medicalizado con base en Ourense, pero nada se puido facer por salvar a vida do condutor. Mentres, o condutor do camión resultou ileso.
A Garda Civil confirmou que o condutor falecido levaba o cinto de seguridade e que o condutor do camión foi sometido ás probas de alcoholemia, que deron resultado negativo.
A circulación nese tramo da autovía quedou cortada nese punto e establecéronse desvíos pola N-120.
