Investigan as causas do incendio no que morreu unha muller en Narón
Unha muller faleceu este sábado no incendio da súa vivenda en Narón. Investígase que puido orixinar o lume. Os veciños da casa contigua sentiron un estrondo moi potente.
No interior da vivenda había tres persoas, dúas irmás e un sobriño. O home puido saír polo seu propio pé. Os veciños conseguiron evacuar unha das mulleres, pero a outra, coa mobilidade reducida, quedou atrapada no cuarto da planta baixa onde comezaron as lapas.
A intervención dos bombeiros foi rápida e impediu que as lapas se estendesen ás plantas superiores. Logo de sufocar o incendio, os traballos centráronse en asegurar a casa e en realizar medicións para desbotar a presenza de gases tóxicos para os veciños.
Contra as seis da tarde o xuíz permitiu o traslado do cadáver. A Policía Nacional ten aberta unha investigación para clarificar as causas e as circunstancias nas que ocorreu este suceso.
