Feijóo agasalla cuns 'sanandresiños' os reis e fai un chamamento ao turismo global

Tras agasallar os reis con senllos sanandresiños, os amuletos de Santo Andrés de Teixido que se fan con migas de pan, Alberto Núñez Feijóo, presentou na edición 42 de Fitur a oferta turística de Galicia nun posto máis colorido ca nunca porque, explicou, quere ser un alegato ao optimismo fronte á pandemia.

"Non hai que entregarse á resignación. Abonda con camiñar a Galicia", dixo o presidente.

Feijóo convidou o mundo a visitar Galicia, un dos destinos máis seguros, como acreditan, dixo, os datos da pandemia.

"Somos a comunidade coa porcentaxe de vacinación máis alta de España e por iso Galicia é o lugar máis seguro. E Galicia está enfocada no 2022 como un destino internacional de referencia. O noso chamamento é global porque o Xacobeo é a festa universal de Europa occidental", afirmou Feijóo.

"NON HAI ESCUSAS"

O presidente engadiu que Galicia está agora máis preto de todo grazas ao AVE, como lembrou tamén o alcalde de Madrid, que asegurou que xa non hai escusas para non vir.

"Quizáis das últimas que se dicía é que era difícil chegar. Agora dúas horas e cuarto a Ourense. Xa non hai escusa", afirmou José Luis Martínez-Almeida.

A hospitalidade, segundo Feijóo, é o sexto sentido dos galegos.