Feijóo cre que a renuncia de García-Gallardo demostra que "algo se move en Vox"

O líder do PP, Alberto Núñez Feijóo, apuntou que "algo se move en Vox", polas renuncias de "personaxes importantes" desta formación.

Feijóo fixo esta afirmación en Antena 3, tras a dimisión onte a todos os seus cargos en Vox de Juan García-Gallardo, quen foi vicepresidente de Castela e León.

O presidente do Partido Popular sinala que é "evidente que hai xente que non está de acordo en como se dirixe, como se organiza e como se manda nese partido", en referencia ao líder desta formación, Santiago Abascal.

O líder do PP denunciou novamente unha pinza de Vox e o PSOE na súa contra, cando denunciou que o primeiro obxectivo da formación de Santiago Abascal é "facer oposición á oposición que é o PP" e recalcou que no seu caso non se desviará do seu obxectivo de cambiar o Goberno de Sánchez.

Tamén restou importancia á alza de Vox nas sondaxes porque cre que os de Abascal están regresando á posición que tiñan en 2019, de arredor do 15 %, tras o "baixón" das xerais de 2023, mentres que o PP segue crecendo.