Ferrol será a primeira cidade en instalar gaiolas para xabarís en zonas urbanas

Os veciños están preocupados pola presenza, cada vez máis habitual, de porcos bravos nas zonas urbanas. Din que aos danos que provocan hai que engadir a inseguridade que xeran.

Unha veciña de Canido asegura que o seu fillo viu un grupo de 12 animais, unha situación que, segundo apuntou, "dá moito medo". Outro veciño da zona di que "nestes casos o mellor é apartarse porque non sabes como poden reaccionar estes animais salvaxes".

Para tentar acabar con este problema, a Xunta e o Concello de Ferrol asinaron un convenio de colaboración pioneiro na nosa comunidade.

Ana Lamas, concelleira de Medio Ambiente, di que Ferrol será a primeira cidade de Galicia onde se instalarán estes dispositivos e apunta a que será a Xunta a que marque o protocolo de actuación.

Belén do Campo, directora xeral de Patrimonio Natural, xa avanzou que o primeiro paso é contar coa autorización dos propietarios dos terreos onde se instalarán as gaiolas, o método de cebado das gaiolas e a forma de desfacerse do animal unha vez capturado.

Dende o Concello de Ferrol agardan comezar a instalar as gaiolas en dúas semanas para que imaxes coma estas non volvan repetirse.