Fracasa a investidura, Núñez Feijóo tampouco logra os apoios na segunda votación

O líder do Partido Popular, Alberto Núñez Feijóo, non logrou este venres no Congreso, na segunda votación da súa investidura, os votos necesarios para ser elixido presidente do Goberno. O resultado foi de 172 votos a favor, 177 en contra e un nulo.

Finalmente non se repetiu o resultado do mércores pasado, que fora de 178 en contra e 172 a favor, debido ao erro do deputado de Junts, Eduard Pujol, que votou si e ao instante rectificou.

Tras a votación, a Mesa do Congreso reuniuse durante máis de cinco minutos dentro do hemiciclo para aclarar o resultado e decidiu anular este voto, ante as queixas da bancada do PP.

Desta forma péchanse os tres días de debate dunha investidura fracasada que se converte na cuarta errada desde 1979, tras a dúas do dirixente socialista Pedro Sánchez en 2016 e 2019 e a do expresidente do Goberno do PP Mariano Rajoy, en 2016.

Núñez Feijóo: "Mereceu a pena"

O líder do PP mostrouse satisfeito a pesar de non lograr ser elixido presidente do Goberno, ao considerar que o seu intento de investidura "mereceu a pena".

Núñez Feijóo transmitiu esta mensaxe á prensa nos corredores do Congreso despois da votación coa que se pechou o debate de investidura.

A presidenta do Congreso, Francina Armengol, comunicará hoxe ao rei Filipe VI o resultado desta votación para que o monarca volva abrir unha rolda de consultas cos representantes das formacións con escano no Congreso, co fin de propoñer a un novo candidato.

A designación dun segundo candidato polo rei abrirá o prazo para que busque os apoios necesarios antes do 27 de novembro ou, pola contra, convocaranse eleccións para o 14 de xaneiro.