Galaxia celebra os seus 75 anos cun programa cheo de actividades para difundir a cultura galega

A Editorial Galaxia conmemorará este 2025 o seu 75 aniversario, desde a súa creación en 1950, cun programa cheo de actividades para difundir a cultura galega, exposicións e varios premios literarios.

Nun acto levado a cabo este venres en Vigo, a editorial reivindicou a súa historia "ao servizo da lingua e da cultura galega" como un exercicio "de resistencia e de defensa do propio".

"Iniciamos un ano que servirá para reforzar o noso compromiso co libro galego, coa nosa lingua e a nosa cultura, manténdonos fieis aos principios que en 1950 puxeron en pé este proxecto", subliñou o director de Galixia, Xosé Soutullo.

Baixo o lema 'Crear porvir', Galaxia afronta este ano reafirmando o seu apoio aos valores que a viron nacer e adaptándose aos retos do século XXI, segundo dixeron durante o evento, celebrado no Hotel Ciudad de Vigo.

Soutullo destacou que durante todos estes anos a editorial publicou uns 3.500 títulos duns 1.500 autores. Tamén puxo en valor a Revista Grial, que se publica de forma trimestral desde 1963 de forma ininterrompida.

Entre as obras deste ano, denominado Ano Castelao, a Editorial editará un facsímile das versións manuscritas de 'Os vellos non deben namorarse' e novas publicacións da obra do autor.

O programa conmemorativo inclúe máis de 60 iniciativas ao longo de todo o ano, estruturándose arredor de exposicións, foros de debate, premios literarios, producións audiovisuais ou eventos dirixidos a todos os públicos.

Actividades

Así, Galaxia creará este ano o I Premio Xosé Neira Vilas de Literatura Xuvenil, co obxectivo de fomentar a creación literaria e a lectura en galego. Estará dotado de 6.000 euros.

Ademais, levará a cabo o Premio Galaxia de Novela 75 Anos, que se dará a coñecer o 23 de abril cunha dotación de 25.000 euros. Segundo indicaron, trátase dun galardón especial que fai referencia ao organizado no 25 aniversario da editorial e que gañou no seu día Carlos Casares, polo que non está previsto que teña continuidade.

Noutra orde de cousas, xa se está organizando a exposición itinerante 'Crear porvir 75º Aniversario Editorial Galaxia', que percorrerá as sete grandes cidades galegas ao longo deste ano. Comezará por Santiago de Compostela en febreiro e terminará en Vigo en decembro. Con todo, esta non será a única exposición, xa que a editorial organiza máis mostras en Vigo ou en Ourense.

Tamén, segundo anunciaron, prepárase un documental sobre os 75 anos de historia, que estará dirixido por Ana Viqueira e producido por Nós TV. Será presentado en febreiro e recollerá voces de persoas destacadas que formaron parte de Galaxia ao longo dos anos.

Pola súa banda, para tratar de chegar aos máis novos, Galaxia propón unha serie de actividades como obras de teatro e libros infantís para achegar e ensinar a cultura e a lingua galega aos nenos.

Tamén se celebrarán ata catro Foros Grial. O primeiro deles xa se celebrou en novembro de 2024, centrándose en temas como a sociedade e a economía galega, a comunicación ou a ciencia.

O acto central do 75 aniversario da editorial terá lugar en Santiago no mes de setembro, cunha festa conmemorativa na cidade onde comezou a historia de Galaxia en 1950.