Polémica en Xinzo de Limia polo décimo da Lotería Nacional que lle chama 'Ginzo'
Hai desconcerto e incluso enfado pola deturpación do nome oficial en galego
Ademais pon 'Orense', que tampouco está ben, segundo o artigo 10 da a Lei 3/1983, de 15 de xuño
Todos os grupos municipais van esixir que se respecte o topónimo oficial ao Ministerio de Facenda e a Loterías e Apostas do Estado, e o BNG vai reclamar nas Cortes o respecto pola lei e os dereitos lingüísticos de Galicia
Polémica na vila de Xinzo de Limia pola emisión dun décimo da Lotería Nacional para este sábado. Fíxense ben no texto a ver se lles chama a atención. Si, pon 'Ginzo', o que non é correcto. E ademais pon 'Orense', que tampouco está ben. Os veciños din que están contentos con que apareza a imaxe da pantalla do seu Entroido, pero tamén hai certo desconcerto e incluso enfado pola deturpación do nome oficial en galego, Xinzo de Limia.
A Lei de Normalización Lingüística do ano 1983 di que os topónimos, nomes de lugares e rúas teñen como única forma oficial o galego. E ademais na asociación A Pantalla houbo queixas.
Con todo, o décimo estase vendendo a moi bo ritmo. E tamén hai quen resta importancia ao mal uso da nosa lingua.
Desde o Concello de Xinzo de Limia, o concelleiro de Cultura asegura que este xoves todos os grupos municipais no pleno lle van esixir a Loterías e Apostas do Estado e ao Ministerio de Facenda que respecten a lei e non deturpen o topónimo oficial. Tamén o deputado do BNG esixirá nas Cortes que o Goberno cumpra coa normativa e os dereitos lingüísticos de Galicia.
