Galicia conta coa primeira Startup Village promovida pola UE en España

Reter o talento local e, sobre todo, atraer emprendedores que cheguen dende fóra. Para iso naceron as Startup Village. Polo de agora só hai catro en toda a Unión Europea, e unha delas fórmana os concellos de San Xoán de Río e A Pobra de Trives. Unha figura administrativa coa que estes municipios aspiran a fixar poboación conforme a proxectos vinculados ao territorio pero tamén ás novas tecnoloxías.

Os dous concellos levan anos aproveitando as axudas e programas que ofrece a Unión Europea para o desenvolvemento rural. De feito, os alcaldes son comisarios europeos locais e están en permanente contacto con Bruxelas. Esa experiencia serviu, sen dúbida, para superar o duro proceso de selección que os levou a obter a condición de Startup Village.

Dende Trives e San Xoán animan a outros concellos rurais galegos a informárense sobre os recursos que chegan cada ano dende Europa. Esta iniciativa do Val do Navea é un claro exemplo.