Galicia devece polo ciclismo na semana do Gran Camiño

Quedan tres días para que as bicicletas tomen de novo as estradas galegas. Tiveron que pasar máis de 20 anos para que o ciclismo profesional percorra novamente a nosa xeografía, como antano fixera a Volta a Galicia. O xoves daráselle o tiro de saída ao Gran Camiño. A primeira etapa arranca no Porriño e remata en Vigo. 165 quilómetros para ir abrindo boca. A partir de aí, e ata o domingo, a proba medra en intensidade.

Samuel Blanco, do equipo portugués Tavira, é un dos cinco galegos que disputará a proba. Esta é a súa terceira temporada na máxima categoría. O Gran Camiño será o primeiro exame que faga esta campaña. Samuel, que debuta na casa, comparte equipo con outros dous galegos: Álex Marque e Delio Fernández.

Imaxinen agora a grandeza do reto cando entre os teus adversarios está Alejandro Valverde. O campión mundial de fondo en 2018 volve á competición comandando un Movistar moi potente. Valverde compartirá filas con Gorka Izaguirre ou Iván Sosa. Entenderán que a expectación sexa máxima ante o retorno da clásica galega que, por certo, poderán seguir nesta casa.