Galicia esixe rectificar ao Goberno: a acollida de menores de 2023 non se fixo por "colapso" nas Canarias

A Xunta de Galicia volveu a esixir este xoves unha rectificación ao Goberno central despois de que acusara varias comunidades de non acoller os menores migrantes comprometidos en 2023, algo que a Administración autonómica nega. Aseguran que a acollida -de 28 menores no caso de Galicia- non se completou polo "colapso" administrativo que sofren as Canarias.

Así o transmitiron esta mañá varios cargos autonómicos, entre eles a conselleira de Política Social e Igualdade, Fabiola García, que participou por videoconferencia na conferencia sectorial celebrada este mércores en Santa Cruz de Tenerife.

En declaracións aos medios a conselleira tachou de "deslealdade" as acusacións do Executivo respecto de comunidades que "recibiran financiamento en 2023 sen acoller os menores".

"Iso non é certo. A hoxe aínda non recibimos os 28 menores non acompañados correspondentes a 2023. Co cal, non é que as comunidades sexamos insolidarias, senón que tendo os acordos asinados coas Canarias aínda non se enviaron eses menores", insistiu Fabiola García.  

A conselleira relatou que o propio presidente de Canarias recoñeceu na conferencia sectorial as "dificultades a nivel burocrático, a nivel administrativo" que están a afrontar. "Pediron desculpas por todas as trabas que tiveron, a saturación que teñen nestes momentos", sinalou.