Galicia pecha o 2023 con 34.400 empregados máis e roza os 1,14 millóns
Galicia pecha o 2023 con 34.400 empregados máis e roza os 1,14 millóns
España suma 783.000 empregos e pecha 2023 coa menor taxa de paro desde 2007, do 11,76 %
O mercado laboral xerou en Galicia 34.400 postos de traballo no ano pasado, a pesar da caída no cuarto trimestre de 5.500 empregos. Así, remata cunha ocupación de case 1,14 millóns de persoas.
O Instituto Nacional de Estadística (INE) publicou este venres a Enquisa de Poboación Activa (EPA), indicando o balance do paro no 2023 en Galicia: o desemprego reduciuse en 16.600 persoas, chegando ata os 114.700 parados. Isto deixa a taxa de paro no 9,15 %.
Así mesmo, aumentou a poboación activa en 17.800 persoas, ata os 1,25 millóns, polo que a taxa de ocupación se sitúa no 53,19 %.
O presidente da Xunta, Alfonso Rueda, di que son cifras que convidan ao optimismo, pero que cómpre seguir tomando medidas para axudar todos os que queiran traballar a atopar un emprego.
21,25 millóns de ocupados en España
O mercado laboral creou 783.000 empregos durante 2023, ata pechar o ano en récord, rozando os 21,25 millóns de ocupados, e cunha taxa de desemprego do 11,76 %, a menor desde 2007, antes de que irrompese a crise financeira.
Segundo a EPA, o desemprego reduciuse en 193.400 persoas durante 2023, ata os 2,83 millóns de parados, reducindo así a taxa de paro oito centésimas (ata o 11,76 %).
Este incremento do emprego superior ao descenso do paro foi posible grazas ao aumento da poboación activa, con 589.600 persoas que saíron da inactividade durante 2023, deixando a taxa de actividade no 58,99 % da poboación total.
O presidente do Goberno, Pedro Sánchez, valorou os "extraordinarios" datos de emprego de 2023, que mostran que "España crece e crea máis e mellores empregos".
No mesmo sentido, a vicepresidenta segunda e ministra de Traballo, Yolanda Díaz, considerou que se trata do "mellor ano" en creación de emprego desde 2005, cuns datos que "demostran que as políticas públicas iniciadas por este Ministerio funcionan".
O paro baixou en industria, agricultura e construción
Por sectores, o desemprego baixou na industria (29.900 menos), a agricultura (21.300) e a construción (19.100), cun lixeiro incremento nos servizos (4.100).
E diminuíu especialmente o paro de longa duración, con recortes entre os que perderon o seu emprego fai máis dun ano (108.100 menos), así como o daqueles que buscan o seu primeiro emprego (19.000 menos).
Os fogares con todos os seus membros en paro caeron en 115.100 en 2023
A EPA establece que os fogares con todos os seus membros activos en paro reducíronse en 115.100 en 2023, ata un total de 932.400.
Por outro lado, o número de fogares con todos os seus membros activos en paro aumentaron en 3.600 e os que tiñan todos os seus membros activos ocupados creceron en 76.400.
No peche do ano, en España había 9.487.500 fogares, 268.800 máis ca o ano anterior, dos que 5,5 millóns, o 28 %, eran unipersoais.
