Galicia rexistra o maior aumento en constitución de hipotecas en 2024, cun 26,6 %

As hipotecas constituídas para adquirir unha vivenda aumentou en todas as comunidades autónomas no ano 2024, rexistrando Galicia o maior incremento cun 26,6 %, segundo os datos publicados ese mércores polo Instituto Nacional de Estatística (INE). En España creceu un 11,2 % a constitución de hipotecas sobre vivendas en 2024 con respecto ao ano anterior, ata as 423.761, aínda que quedaron por baixo da cifra de 2022, e o seu importe medio aumentou un 2,7 %, ata os 145.673 euros. O capital prestado aumentou un 14,2 % e alcanzou os 61.730,5 millóns no conxunto do Estado.

O aumento na constitución de hipotecas en 2024 prodúcese despois da caída de case un 18 % que experimentaron en 2023, pero non chegaron ás 464.107 con que se pechou o ano 2022, aínda que o incremento anual que houbo en 2024 é o máis alto desde 2021, cando aumentaron un 23,8 %. En decembro, as hipotecas sobre vivendas subiron un 30 % sobre o mesmo mes de 2023 e alcanzaron as 32.249, a súa cifra máis baixa desde agosto pasado.

O importe medio das operacións en decembro foi de 152.337 euros, un 8,3 % máis que no mesmo mes do ano anterior, e o tipo de interese medio das novas situouse no 3,25 %. O prazo medio foi de 25 anos e, do total das hipotecas constituídas en decembro, un 36,6 % foron a tipo variable e un 63,4 % a tipo fixo. O tipo de interese medio ao comezo foi do 3,16 % para as hipotecas sobre vivendas a tipo variable e do 3,30 % para as a tipo fixo.