O Goberno deixa o proxecto de Altri fóra das axudas á descarbonización

O proxecto de Altri para a implantación da factoría de Palas de Rei quedou fóra das as axudas europeas do PERTE de descarbonización que solicitara a compañía, en concreto 30 millóns de euros que aspiraba a obter nesta convocatoria.

Logo de que este martes á noite a vicepresidenta segunda do Goberno e ministra de Traballo, Yolanda Díaz, corroboraba que Altri non obtería eses fondos, este mércores o ministro de Industria, Jordi Hereu confirmaba a decisión que atribuía a criterios "estritamente técnicos".

Hereu recordou que a empresa "ten dereito a recorrer a decisión" e dixo que do mesmo xeito que outras empresas, Greenfiber (a sociedade promotora do proxecto GAMA, formado por Greenalia e Altri), "non obtivo a puntuación mínima para a avaliación, nin tampouco sacou a puntuación (necesaria) en todos e cada un dos parámetros".

"Como sempre, en calquera Perte, hai empresas que gañan e empresas que non chegan á puntuación debida", explicou o ministro, que insistiu en que a resolución responde a unha "avaliación estritamente técnica e en base a isto as empresas teñen o dereito para alegar, como en calquera outro proceso".

Aínda que admitiu que a implantación desta fábrica de celulosa "é un proceso suxeito a un gran debate social e político", dixo que para o seu ministerio é "un caso máis" e que o seu papel é avaliar de maneira obxectiva os procesos industriais que se presentan ás convocatorias.

Yolanda Díaz, pola súa parte, dicía esta noite pasada en redes sociais, comentando a noticia adiantada en exclusiva por eldiario.es, que "o Executivo central non vai apoiar ningún proxecto que poña en risco a poboación, a natureza, o noso ecosistema, a propia vida. Sempre dixemos alto e claro: Altri non. E hoxe dicímolo tamén desde o Goberno, como levamos defendendo desde un inicio".

Tres anos despois de que Altri anunciase a localización da súa factoría de celulosa e lyocell en Palas de Rei, o proxecto estaba pendente de distintos trámites, o principal, o capital necesario, ao prever sufragar 500 millóns con débeda, 250 con fondos privados e os restantes con axudas públicas directas.

Rueda acusa o Goberno de discriminar Galicia

O presidente da Xunta, Alfonso Rueda, acusou o Goberno de discriminar Galicia na repartición dos fondos europeos e de endurecer na comunidade galega "a vara de medir ambiental" a proxectos como o de Altri.

"Financiamento sen ningunha esixencia ambiental -noutras rexións-, todas as esixencias ambientais para Galicia", sostivo o presidente galego, que considerou que "non pode ser" que se os proxectos en Galicia cumpren as "durísimas condicións" se lles negue "todo" a pesar de "contar con declaracións de impacto ambiental aprobadas".

O presidente da Xunta referiuse de maneira directa a esta cuestión e avanzou que o seu Goberno “vai ser firme” porque, dixo, “non toleraremos discriminacións nin exclusións baseadas en escusas de mal pagador”.

Foi crítico unha vez máis coa postura dos principais grupos da oposición en Galicia, BNG e PSdeG, que se opoñen ao proxecto de Altri, polo que lles advertiu de que non vai “tolerar que os que levan anos tentando expedir títulos de bos e malos galegos poidan emitir tamén bula de boas e malas empresas”.

Altri recorrerá a exclusión do proxecto de Palas do PERTE de descarbonización

A multinacional portuguesa, mentres tanto, cando aínda non había "comunicación oficial" por parte do Ministerio de Industria, anunciaba que recorrerá esta exclusión, á vez que garantía que o proxecto "segue o seu curso" aínda que non reciba este apoio.

Greenfiber, filial de Altri, explica que a participación nesta convocatoria do Perte "produciuse con pleno coñecemento de que, no marco dos compromisos asumidos ante a Comisión Europea, que contemplan que os proxectos candidatos débense completar antes do 31 de marzo de 2026, Gama (nome da fábrica) non podería ser elixible por razóns de prazo fóra de que, tal e como se trasladou á empresa, o Goberno español conseguise acordar coa Comisión Europea unha prórroga, considerando que había máis proxectos que se atopaban na mesma situación de incumprimento do prazo de execución". "A día de hoxe, non nos consta que a Comisión Europea aprobase esa prórroga", agrega.

Por iso, recorrerá a resolución do Ministerio de Industria, "na confianza de que o Goberno de España poida alcanzar un acordo coa Comisión Europea para a ampliación do prazo de execución e tómense en consideración as alegacións da compañía".

"En calquera caso, a decisión de continuar co proxecto nunca estivo supeditada á inclusión de Gama no Perte de Descarbonización Industrial", deixa claro. Altri indica que esa "é unha máis das vías que a empresa está a explorar para articular a estrutura financeira do proxecto e reducir o risco do investimento inicial, que supera os 1.000 millóns de euros". "Por tanto, a non obtención desta axuda non altera a folla de ruta previsto", sentenza a compañía.

Besteiro cre que Altri tampouco recibirá axudas extraordinarias por non cumprir requisitos

O líder do PSdeG, José Ramón Gómez Besteiro, considerou este mércores que o feito de que a empresa lusa Altri non vaia recibir as axudas europeas do Perte de descarbonización que solicitara para a posta en marcha da macrofactoría de celulosa en Palas mostra que tampouco terá axudas extraordinarias ao non cumprir os requisitos.

A xuízo do dirixente do PSOE galego, a decisión do Executivo central é “unha boa noticia para Galicia” e confirma o que el mesmo dixo “hai meses”, porque o proxecto da empresa Altri “non é merecedor desas axudas” debido a que non se expón unha fábrica que “descarbonice”.

Ulloa Viva : “Non podemos baixar a garda, 30 millóns non son nada para eles"

A portavoz da Plataforma Ulloa Viva, Zeltia Laya, celebrou este mércores que o proxecto de Altri quedase fóra do financiamento do Perte de Descarbonización, pero recomendou "non baixar a garda”.

Nese sentido, lembrou que “30 millóns non son nada para eles, é diñeiro solto”, tendo en conta de que a sociedade promotora do proxecto Gama reclama 250 millóns de fondos públicos para afrontar un investimento total que podería superar, segundo datos da propia empresa, os 1.000 millóns de euros.

"Mantémonos alerta”, puntualizou, porque a empresa “ten solicitadas varias axudas” e esa denegación de fondos “aínda” non foi publicada oficialmente.

Ao seu xuízo, aínda que é un momento para estar “contentos, porque as noticias son positivas”, haberá que ler a “letra pequena” desa resolución, para coñecer os argumentos que levaron ao Goberno de España a tomar esa decisión.

Con todo, apuntou: “Estamos moi seguras do que levamos dicindo todo este tempo, de que non cumpre os principios para solicitar axudas nun contexto de cambio climático e descarbonización”.

Greenpeace: “un gran paso” 

A organización ecoloxista Greenpeace, que se opuxo activamente á implantación de Altri en Palas de Rei, cualificou como “un gran paso” a confirmación de que ese proxecto industrial non recibirá fondos do PERTE de Descarbonización.

Greenpeace precisa que a organización se manterá “atenta á publicación do expediente” para coñecer se a solicitude de Altri foi denegada por unha “cuestión de prazos” ou por “dúbidas” por parte do Goberno sobre “a sustentabilidade e a viabilidade do proxecto”.

En todo caso, insiste en que de corroborarse esta decisión, para Greenpeace sería un primeiro paso de enorme importancia para evitar que se malgaste diñeiro público dunha forma “inasumible e inxusta”.

Afirma que sería “financiar o proxecto industrial máis lesivo que se presentou en Galicia nas últimas décadas”.