Galiforest arranca en Boqueixón con 107 expositores

O sector forestal galego ten unha cita inescusable estes días en Sergude (Boqueixón) na sétima edición de Galiforest. É a feira máis importante en toda España, que este ano presta especial atención á innovación e á internacionalización.

Este ano o certame supera todos os rexistros: conta cunha superficie de 15.300 metros cadrados, 107 expositores (11 internacionais) e 200 demostracións de maquinaria como autocargadoras, procesadoras forestais ou miniserradoiros.

Ricardo Durán, director xeral da Fundación Semana Verde, di que nesta edición hai 21 innovacións tecnolóxicas que se presentaron no concurso e que o bo desta feira é que a parte expositiva é espectacular e todo o que se expón pódese ver funcionar.

Galiforest recibirá máis de 7.000 visitantes ata o sábado, cando a feira apague os seus motores.