Helton: "Teño un ano máis de contrato, non penso nunha ampliación"
O porteiro non quixo afondar na polémica actuación do colexiado Lax Franco, que non anulou o gol do empate (1-1) do Castelló
O porteiro brasileiro Helton Leite afirmou este mércores que nestes momentos non pensa nunha ampliación de contrato co Deportivo, co que aínda lle resta un ano.
"Por diante aínda temos once partidos, e son moi importantes para o club, para min persoalmente e para todos. Teño un ano máis de contrato, e non estou a pensar niso, estou feliz e centrado en terminar moi ben esta tempada", manifestou en conferencia de prensa.
Con dúas paradas salvadoras, o gardameta foi decisivo para que o Dépor sumase un punto fronte ao Castelló (2-2), para alongar ata catro as xornadas sen perder do conxunto branquiazul.
"Sumamos un punto nun campo difícil", apuntou Helton.
O porteiro non quixo afondar na polémica actuación do colexiado Lax Franco, que non anulou o gol do empate (1-1) do Castelló polo que parecía unha clara falta sobre David Mella.
"Pode haber erros en contra, a favor... non sei. Os árbitros son seres humanos. Ademais de haber un VAR, hai sempre interpretacións. Hai que respectalas e temos que facer o noso traballo. Pola miña banda, non estou a pensar niso, só estou a pensar no Cartaxena", destacou.
