Huskic segue un ano máis no Leyma
Huskic segue un ano máis no Leyma
O pivote serbio continúa na cidade herculina tras mediar once puntos e case seis rebotes o ano pasado
Quinta renovación para o equipo coruñés, que se estreará esta tempada na ACB
O Leyma confía nos piares que o axudaron a ascender o ano pasado. Tras a renovación de Lundqvis, Diagne, Burjanadze e o capitán Álex Hernández, chegoulle a quenda a Goran Huskic. O interior serbio afronta a súa segunda tempada na Coruña, logo de contribuír ao ascenso no anterior ano con once puntos e case seis rebotes de media.
O xogador balcánico non é un novato na elite do baloncesto español. Disputou a Liga ACB con Guipuzkoa Basket, San Pablo Burgos ou Bilbao Basket. Foi en terras burgalesas onde coincidiu con Diego Epifanio, o seu actual adestrador na Coruña.
Huskic comprométese co Leyma ata 2025 e convértese no quinto xogador anunciado pola entidade coruñesa, todos como renovacións. Agárdase que o Básquet Coruña comece a anunciar novos xogadores nos vindeiros días.
