Iago Aspas está no 'top ten' dos goleadores da Liga deste século

Iago Aspas cumpre os cincocentos partidos e segue apañando minutos e goles. Cada tempada pode ser a última para o galego, pero na que estamos segue moi lonxe de perder relevancia.

Oito partidos xogados, seis de titular e 4 dos 15 tantos que leva marcados o equipo de Claudio Giráldez teñen o seu cuño. Aspas devece igual dentro ca fóra do campo, cun espírito competitivo que funciona de vitamina base para os celestes.

O de Moaña sábese xa con casa propia no andel da historia da liga española onde a día de hoxe ocupa a vixésima posición na lista de goleadores. Unha posta de privilexio na que acaba de poñerse por diante de Aduriz ou Puskas; na que asexa a dúas dianas de Luis Aragonés, a catro de Samuel Eto'o, e con futbolistas por diante que son palabras maiores: Messi, Ronaldo, Telmo Zarra...

A estatística do dez celeste aínda é moito mellor cando pechamos o foco sobre os 24 primeiros anos deste século XXI. Aspas ascende ao posto sétimo dos mellores nunha presada de futbolistas únicos e irrepetibles. Con 159 goles senta fachendoso á mesma mesa na que comparten mantela, goles e a admiración do público Leo Messi, con 472 goles; Cristiano Ronaldo 311; Benzemá, 238; Griezmann; David Villa e Luis Suárez.

Todos grandes, en equipos grandes, a mesa posta cun peixe cativo, veciño de vila pequena, asalariado en club pequecho, pero con talento a barullo como para facerse enorme a cada minuto que viste ese escudo no peito.