Iglesias téndelle a man a Yolanda Díaz e pide unidade malia os "desprezos"

O exvicepresidente do Goberno Pablo Iglesias defendeu a unidade das formacións situadas á esquerda do PSOE e tendeulle a man á vicepresidenta Yolanda Díaz, e á súa plataforma Sumar, para "camiñar xuntos", malia "os insultos, ninguneos e os desprezos".

Na Festa da Primavera de Podemos celebrada en Zaragoza, dixo que hai algo moito máis importante que a dignidade de toda esa militancia "doída, enfadada" que é "poder seguir transformando" o país e tratar de frear un proceso de involución democrática en Europa.

A formación violeta comeza a precampaña electoral con este acto no que interviñeron as ministras Irene Montero e Ione Belarra, a secretaria de Estado de Igualdade e contra a Violencia de Xénero, Ángela Rodríguez, ou a candidata á Comunidade de Madrid, Alejandra Jacinto.

Na mesma liña de "unidade" foron as palabras de Montero, que defendeu un acordo de coalición con Sumar malia subliñar que Podemos é "moi diferente" da plataforma de Díaz, Más Madrid e Compromís, formacións que arrouparon a vicepresidenta o día 2 de abril.

Malia e todo, considerou que é “mellor un acordo de coalición entre Podemos e Sumar” e mostrou a disposición do seu partido para achegar a súa capacidade co obxectivo de “ser o motor destas transformacións” a un proxecto colectivo.

Lei do "só si é si"

A ministra de Igualdade dirixiuse ao PSOE durante o seu discurso para pedirlle que chegue a un acordo coa maioría de investidura para reformar a lei do "só si é si" para non "volver ao esquema penal anterior", que implicaría un "retroceso incomprensible".

"Os dereitos das mulleres non se negocian, e menos, co PP".

Máis tarde, Ángela Rodríguez asegurou que os socialistas están "a traizoar a moitísimas mulleres” que apoiaron o Goberno de coalición.

“A agresión sexual tense que definir pola ausencia de consentimento, non pola presenza de violencia; a violencia tense que penar á parte”.

Lei de vivenda

A ministra de Asuntos Sociais e secretaria xeral de Podemos, Ione Belarra, reivindicou o traballo dos membros morados do Goberno para sacar adiante a lei de vivenda, norma que nunca sería posible sen o "empuxe de Podemos", insistiu.

Belarra pediu non deixarse enganar por quen vai atribuírse "por electoralismo" o mérito de que a norma vexa por fin a luz, xa que foi grazas ao acordo "histórico" alcanzado con ERC e EH Bildu para aprobala no Congreso.

"Hoxe gaña a xente, gaña a cidadanía e perde Blackstone, os fondos voitre, a banca, os especuladores que levan décadas xogando ao monopoly cos alugueiros e as hipotecas da nosa xente. Para iso é a lei, para lembrarlles alto e claro que as casas son para vivir, non para especular", agregou.

A lei servirá ademais, dixo a ministra de Asuntos Sociais, para acurralar o Partido Popular, que terá que explicar "por que en Valencia, en Palma ou en Aragón os prezos do alugueiro se conteñen ou baixan e por que en Madrid non paran de subir, afogando os inquilinos e as inquilinas".

Pola súa banda, Iglesias valorou que este acordo sobre a lei da vivenda non gusta aos socialistas e proba diso "é que o presidente da patronal inmobiliaria chámase Joan Clos, que foi alcalde de Barcelona polo PSC e ministro do PSOE".