Illa, proposto candidato á presidencia de Cataluña; o debate de investidura será este xoves

O presidente do Parlament de Catalunya, Josep Rull, acordou este martes designar a Salvador Illa como candidato á presidencia da Generalitat, logo de constatar que conta cos apoios do seu propio grupo, o Pardido dos Socialistas de Cataluña (PSC), de Esquerra Republicana de Cataluña (ERC) e Catalunya en Comú.

Deste xeito, Rull anunciou a intención de que o debate de investidura se celebre este xoves a partir das 10:00, para o que anunciou a convocatoria da Deputación Permanente do Parlament para tomar a decisión de fixar oficialmente a data.

A candidatura de Salvador Illa suma en total 68 votos dos 135 escanos cos que conta o Parlament de Catalunya: os 42 do PSC, 20 de ERC e 6 dos comúns.

Unha vez se confirme a data do pleno, a grande incógnita por despexar será o momento en que o expresidente da Generalitat Carles Puigdemont decidirá regresar a Cataluña, tras case sete anos fuxido, coa intención de asistir á sesión de investidura, aínda que xa ten asumido que será detido, xa que o Tribunal Supremo non lle está aplicando a lei de amnistía.

Se se dá esta circunstancia, JxCat xa avanzou que esixirá a suspensión do pleno e emprazará a "todas as forzas democráticas" a acordar unha condena conxunta contra a "actitude de rebelión" do Supremo ao non aplicar a lei de amnistía a Puigdemont.