Imanol Idiakez deixa de ser o adestrador do Deportivo
Imanol Idiakez deixa de ser o adestrador do Deportivo
Nos próximos días, o Club anunciará o nome do novo adestrador
O adestramento deste luns será dirixido por Roberto Cabellud
O Deportivo prescindiu dos servizos do técnico Imanol Idiakez “tras unha exhaustiva avaliación do rendemento do equipo e a súa traxectoria na presente tempada”, informou o club.
A derrota deste domingo ante o Racing de Santander (1-2) en Riazor acelerou a saída do adestrador guipuscoano. Os dirixentes do club reuníronse nada máis terminar o encontro para avaliar a posible saída do técnico que devolvera ao Dépor ao fútbol profesional tras unha longa travesía pola antiga Segunda División B.
O equipo branco e azul é antepenúltimo na clasificación con tan só 10 puntos nas doce primeiras xornadas. O Dépor só gañou dous partidos desde a súa volta a Segunda División, ante o Rácing Ferrol en Riazor e contra o Albacete no Carlos Belmonte.
No seu comunicado, o Dépor agradeceu a Idiakez a súa “dedicación” e “esforzo” durante a súa etapa no club, así como a súa “grande achega” no “ansiado” ascenso da tempada pasada.
“Foi un exemplo de compromiso e profesionalidade, e desexámoslle moito éxito nos seus futuros proxectos”, apuntou o club presidido por Juan Carlos Escotet.
O adestramento deste luns será dirixido por Roberto Cabellud.
