Imposto ás enerxéticas: Inxustificado e economicamente pouco rendible, por Maite Cancelo

Ante a nova do mantemento do gravame ás enerxéticas, Repsol, Cepsa, Galp e BP anunciaron unha perda de investimento de ata 16.000 millóns, ao que hai que engadir o duro comunicado da Asociación Española de Operadores de Produtos Petrolíferos (AOP) que as integra, no que sinalan que, por unha banda, compromete a competitividade da industria e, por outra, dificultaría o proceso de transición enerxética.

Hai que ter en conta que os grandes operadores están a investir grandes sumas en I+D+i, para o desenvolvemento do hidróxeno verde e a captura do CO2 da atmosfera para a elaboración de combustibles sintéticos que sexan compatibles cos motores actuais, tal e como está a desenvolver xa Petronor, empresa vasca participada ao 80 % por Repsol.

En calquera caso, Repsol xa anunciou o traslado dun primeiro proxecto a Portugal, de produción de metanol e bioetanol renovable para unha infraestuctura para o hidróxeno verde, que pode supoñer un investimento duns 800 millóns. Así, a deslocalización dos investimentos pode servir como protesta, xa que, con este gravame a competitividade das nosas empresas vese prexudicada con relación aos outros países da UE onde non hai este tipo de imposto.

De feito, o país luso entende o proxecto como unha iniciativa de Potencial Interese Nacional, ao entender que é un investimento que supón unha contribución significativa á economía do país. Mentres tanto, en España, aumentouse a presión fiscal cara as empresas enerxéticas e o proceso investidor dos seus proxectos industriais está en modo espera dada a inestabilidade regulatoria e fiscal.

É certo que a Ministra de Facenda ten complicado sacar adiante a permanencia este gravame que, lembremos, naceu con carácter temporal, xa que Junts e o PNV xa manifestaron a súa desconformidade polo que, a presión de Sumar e Podemos de converter en estable este imposto probablemente non teña os apoios necesarios na cámara.

O feito de que o cambio na política investidora de Repsol coa mirada posta en Portugal afecta a proxectos do grupo en Euskadi ou en Tarragona, é un factor que están tendo en conta tanto Junts como o PNV, menos condicionados por cuestións puramente ideolóxicas e se polo efecto do imposto nas economías catalá e vasca.

A transición cara unha economía descarbonizada e máis limpa ten que vir non só das intencións políticas senón da implicación do propio sector enerxético. Para que o noso sector industrial non se vexa prexudicado (e, evidentemente, tamén as economías domésticas) necesitamos enerxía máis barata, máis eficiente, que sexa local (para evitar os impactos externos, xeopolíticos) e que sexa respectuosa co medio ambiente.

Todo iso conleva a colaboración entre todos os axentes implicados, sector, universidade e gobernos e, por suposto, grandes investimentos para o desenvolvemento de novas tecnoloxías que poidan producir esa enerxía limpa que necesitamos a prezos máis reducidos. Europa, e España, están a perder a batalla con relación a países como Os Estados Unidos e A China, como se recolle no xa famoso informe Draghi.

A nosa competitividade e o noso futuro industrial dependen de que se realicen estes investimentos e un gravame como o que se quere manter non axudará nada ao ser un Imposto inxustificado, discriminatorio e economicamente daniño para os nosos intereses.