Ingresada no HULA unha muller que ameazou cun coitelo os seus veciños

Nun edificio da rúa Santiago, en Lugo, vivíronse momentos de pánico cando unha residente se puxo a berrar que ía matar a todos os veciños do inmoble. A muller, de mediana idade, profería estas ameazas nunha zona común mentres empuñaba un coitelo de grandes dimensións.

Unha vez alertada a policía, tamén se deu aviso ao 061. Os sanitarios que acudiron ata este lugar intentaron levar a muller nunha ambulancia, pero finalmente foi preciso conducila ao HULA nun coche policial.

Os afectados aseguran que levan xa máis dun ano padecendo os problemas psiquiátricos que arrastra a veciña conflitiva. Din que teñen medo polos seus, sobre todo polos menores, polo que instan os servizos sociais a que tomen medidas de inmediato.

Javier González, presidente da comunidade de veciños: "Hai que ir buscar as mulleres ao garaxe porque teñen medo. Os cativos, o mesmo. Levámolo denunciando dende hai moito tempo. Quen debe actuar son os servizos sociais, porque necesita medicación e non toma". 

Neste último incidente tiveron que actuar tanto patrullas da Policía Local como da Nacional. Os veciños esperan que os seus respectivos informes axuden a que cese canto antes o calvario que lles tocou vivir.