Investigado un veciño de Ourense por enviar paquetes con ameazas a unha xestoría de Xinzo
A empresa recibiu cinco envíos de paquetería "con temática ameazante cara ao responsable e unha das traballadoras da empresa"
Obxectos que o investigado enviaba por correo
O equipo Roca da Garda Civil de Celanova tomou declaración a un home de 51 anos, en calidade de investigado, como presunto autor dun delito de ameazas por correspondencia a unha xestoría de Xinzo.
Segundo informou o instituto armado, a investigación bautizada como Express Ou iniciouse por mor da denuncia presentada no cuartel da Garda Civil de Xinzo de Limia por parte dunha empresa dedicada a servizos de xestoría administrativa e asesoría fiscal desta localidade.
A empresa relatou que durante o mes de febreiro recibiu cinco envíos de paquetería "con temática ameazante cara ao responsable e unha das traballadoras da citada empresa. Ditos paquetes carecían de remitente".
O home está investigado como presunto autor dun delito de ameazas por correspondencia. Os axentes determinaron que "todos" os envíos foron tramitados desde unha oficina de correos que pertence á localidade ourensá da Valenzá, no concello de Barbadás.
