Intervidos en Mos máis de 4.000 bonecos Funko falsificados
Intervidos en Mos máis de 4.000 bonecos Funko falsificados
No almacén tamén había outras 837 bonecas e 256 xogos de cartas sen documentación
A dona do establecemento de venda por xunto non puido acreditar a procedencia nin o valor dos produtos
Produtos comisados no propio establecemento. Garda Civil.
A patrulla Fiscal e de Fronteiras (PAFIT) da Comandancia da Garda Civil de Pontevedra incautou máis de 5.000 bonecos e xogos de cartas falsificados, localizados nun establecemento de venda por xunto de Mos.
Segundo informou a Comandancia, os axentes interviñeron 4.088 produtos falsificados da marca Funko LLC por carecer de documentación de procedencia; así como 837 bonecas e 256 xogos de cartas, tamén supostas falsificacións, e carentes de etiquetaxe e embalaxe.
A intervención produciuse o pasado xoves durante unha inspección dun establecemento en Mos, no marco das actuacións que realiza a PAFIT para detectar produtos fraudulentos ou inseguros para os consumidores, e para detectar posibles irregularidades na documentación.
Neste caso, a propietaria do establecemento non puido acreditar documentalmente a procedencia nin o valor dos produtos, o que pode constituír un delito menos grave contra a propiedade industrial. Os axentes comisaron a mercadoría, que quedou precintada e almacenada no propio establecemento, á disposición da autoridade xudicial.
Por outra banda, a dona do local foi citada en dependencias policiais en calidade de investigada por un suposto delito contra a propiedade industrial e contrabando. As dilixencias foron postas en coñecemento do xulgado de instrución do Porriño.
