Un xogo para localizar os 313 concellos galegos no mapa multiplica seguidores nas redes sociais

"Neste mapa custa un pouquiño máis, ao non estar todos os concellos localizados, custa, pero Caldas de Reis, está aquí", di Pedro Ruiz.

Lucas e Pedro sitúan sen dificultade o concello de onde procedía Domingo Fontán, a quen debemos o primeiro mapa de Galicia feito con rigor científico no século XIX. O matemático ocupou 20 anos de vida en lograr o seu reto. Hoxe o desafío destes dous mozos composteláns é outro e vai algo máis rápido.
 

"Galicia ten 313 concellos e desde que o Celta presentara a súa camiseta para esta tempada na que están todos os concellos postos, pensamos que estaría moi guai sabelos de memoria algún día", di Lucas nun vídeo en TikTok.
"Empezou así coma un pique e ocorréusenos que a mellor forma era sacar un cada día porque así íanos durar case todo o curso", di Lucas.

"As Somozas, agora ten que sinalar no mapa o que el cre que é as Somozas", explica Pedro o xogo.

Case sen darse de conta o entretemento do seu piso de estudantes que comparten en Vigo, fíxose viral nas redes e saíron á rúa.

"Vimos que a xente da nosa idade ten moitísimo máis descoñecemento que a xente máis maior. Eu achácollo a que a xente máis maior ten máis quilómetros de coche e entón pode tirar máis por iso".

"Saíron vídeos dalgún profesor explicando iso mesmo para os rapaces. Etiquetáronnos a xente neses vídeos e a nós parécenos perfecto e gústanos, claro", apunta Pedro.

"Gustaríanos espertar ese interese na xente... Vale, agora que aprendemos os concellos con vós, ensinádenos máis cousas, de montañas, de ríos. Gústanos espertar ese interese da xente por Galicia", engaden.