Investigan o xerente dunha tenda de animais de Ames por facerse pasar por veterinario
Investigan o xerente dunha tenda de animais de Ames por facerse pasar por veterinario
Poñía vacinas aos animais no seu local, pese a carecer da titulación
Emitía cartillas de vacinación con datos falsos e o selo doutro veterinario, quen denunciou o caso
Imaxe dun can cun axente (Garda Civil)
A Garda Civil investiga un home de 55 anos, xerente dunha tenda de venda de animais en Ames por facerse pasar por veterinario e realizar labores de vacinación.
As autoridades atribúenlle os delitos de falsificación de documento e de intrusismo profesional.
A investigación, realizada polo equipo EBIO de Caldas de Reis e polo Seprona, comezou tras a denuncia dun veterinario colexiado da zona de Umia.
Foi quen deu a voz de alarma ao atopar cartillas de vacinación de cánidos co seu selo, os datos de colexiado e unha sinatura que estaban a ser falsificados e utilizados por outra persoa para realizar labores de veterinario.
Os axentes lograron identificar ao falso veterinario, veciño do municipio pontevedrés da Estrada, que xa tiña antecedentes policiais por outro tipo de feitos.
Na súa tenda de Ames, segundo informa a Garda Civil, fornecía vacinas a diferentes animais, a pesar de carecer da titulación necesaria para exercer como veterinario.
As dilixencias instruídas entregáronse no xulgado de instrución de garda de Santiago, onde deberá comparecer o investigado cando sexa requirido pola autoridade xudicial.
