Unha investigación da USC avanza na regulación térmica dos dispositivos electrónicos

Unha investigación da Universidade de Santiago demostra que é posible reducir o quentamento dos dispositivos electrónicos aplicando unha pequena voltaxe que modifica a resistencia á calor.

O estudo do grupo de Química da Materia Condensada achega un avance no desenvolvemento de tecnoloxías máis sostibles e eficientes.

Unha das eivas que presentan os dispositivos electrónicos como ordenadores e móbiles é que o funcionamento dos procesadores acaba producindo unha calor que diminúe o seu rendemento.

Reducir esta temperatura ou incluso transformala en enerxía é o obxectivo futuro deste estudo que traballa con óxido de estroncio e titanio.

"A particularidade que ten este óxido é que é posible mover os ións de osíxeno, é por iso que ten o cambio resistivo. Cando moves o osíxeno dos óxidos sábese que a resistencia térmica pode variar. Entón o que investigamos é se o cambio de resistencia ao paso da corrente eléctrica tamén hai resistencia ao paso da calor", describe Rafael Ramos, do Grupo de Investigación de Química da Materia Condensada.

Con esta medida a resistencia á circulación de calor pódese modular nun 20 %.

"O seguinte paso sería ver se conseguimo ampliar o cambio de resistencia. Estamos investigando tamén os mesmos óxidos e outro tipo que teñan outro tipo de mecanismos, que cambien de estrutura e cousas así", asegura o investigador Rafael Ramos.

Este avance podería aplicarse non só a dispositivos electrónicos senón tamén a outros ámbitos da eficiencia enerxética, como os propios cristais de ventás, para regular a calor nunha vivenda.