Investigan un condutor que publicou un vídeo en Internet circulando a 220 km/h por Lugo
A Garda Civil impútalle un delito contra a seguridade viaria
Un condutor que circulaba a 220 quilómetros por hora na LU-11, entre Nadela e A Tolda de Castela, en Lugo, está investigado por un delito contra a seguridade do tráfico tras gravarse en vídeo e subir o contido ás súas redes sociais.
A Garda Civil tivo constancia o pasado mes de novembro da existencia deste vídeo no que se podía ver como un condutor ía co seu vehículo a 220 quilómetros por hora nunha vía limitada a 100 quilómetros por hora.
O Instituto Armado puxo en marcha unha investigación policial para determinar o día, a hora e o lugar no que foi realizada a gravación, para posteriormente dar coa matrícula do vehículo utilizado e identificar o condutor.
“A identificación do condutor do turismo esixiu un traballo de investigación máis laborioso”, recoñece a Comandancia de Lugo nun comunicado, dado que foi necesario realizar unha “análise exhaustiva e profunda das redes sociais”.
O condutor está sendo investigado por un delito contra a seguridade viaria por conducir a unha velocidade excesiva. Instrúe dilixencias o Xulgado de Garda de Lugo.
