Investigan un presunto intento de violación grupal a unha menor en Ferrol

A Policía Nacional investiga un presunto intento de violación a unha menor por parte dun grupo de adolescentes, tamén menores de idade.

Varias menores máis trasladaron a súa alerta por feitos semellantes, que estarían vinculados cos mesmos sospeitosos, e subliñaron que a denunciante principal sería agarrada e trasladada a un dormitorio, onde se resistiu ao intento do grupo por espila.

Os seus berros permitiron  que outros integrantes da cuadrilla presentes na vivenda acudisen a auxiliala, mentres que a súa denuncia posibilitou que a Policía Nacional analizase os teléfonos móbiles dos implicados, nos que atopou material audiovisual sobre o suceso.

Supostamente os feitos tiveron lugar a comezos de marzo, en Ferrol, no domicilio dun dos implicados. Denunciouno a presunta vítima. Fontes próximas á investigación confirman que dous dos supostos agresores sexuais xa foron enviados a un centro de menores en réxime pechado.

O resto estaría, de momento, en liberdade. Ademais podería haber outras vítimas do mesmo grupo, xa que constan polo menos outras 4 denuncias por feitos similares, aínda que de menor gravidade. A investigación continúa aberta.