Irán advirte de que o ataque israelí en Siria “non quedará sen resposta”

O presidente de Irán, Ebrahim Raisí, asegurou este martes que o bombardeo contra o consulado iraniano en que morreron sete gardas revolucionarios “non quedará sen resposta”, un ataque do que responsabilizou directamente a Israel.

“Unha vez máis, nun crime terrorista e en flagrante violación das normas internacionais, as sucias mans do réxime usurpador sionista (Israel) quedaron manchadas co sangue de varios xenerais e oficiais do noso país”, dixo Raisí nun comunicado.

“Este covarde crime non quedará sen resposta”, asegurou o mandatario.

Raisí afirmou que “os sionistas deben saber que nunca alcanzarán os seus sinistros obxectivos con estas inhumanas accións” e subliñou que o Eixo da Resistencia está a fortalecerse ante a “natureza ilexítima" do país xudeu.

O chamado Eixo da Resistencia é unha alianza informal liderada por Teherán, profundamente antiisraelí e formada por organizacións militantes como Hizbulá, os rebeldes hutís e o movemento islamita Hamas, entre outros grupos.

O mandatario iraniano presidiu onte á noite unha reunión do Consello Supremo de Seguridade Nacional de Irán en que se tomaron “decisións oportunas” acerca das respostas ao ataque, das que non se deron detalles.

No ataque que destruíu onte o edificio do consulado iraniano en Damasco morreron sete membros da Garda Revolucionaria, entre eles o máximo responsable da Forza Quds en Siria e Líbano, o xeneral de brigada Mohamed Reza Zahedi, e o seu segundo, o xeneral de brigada Mohamed Hadi Haj Rahimi.

Trátase do ataque máis sanguento contra militares iranianos en Siria no que vai de 2024, onde ata a data contabilizáronse oito mortos por bombardeos israelís, entre eles dous xenerais da Garda Revolucionaria.

Consulado iraniano en Damasco atacado este luns (Reuters/Firas Makdesi)

Irán enviou unha mensaxe aos Estados Unidos, a través da embaixadora suíza en Teherán, en que os responsabiliza, como aliado principal de Israel, do ataque contra a súa sede diplomática.

“Nesta convocatoria (coa embaixadora suíza) explicáronse as dimensións do ataque terrorista e o crime do réxime israelí, e salientouse a responsabilidade do Goberno estadounidense”, dixo o diplomático iraniano na rede social X.

“Enviouse unha mensaxe importante ao Goberno estadounidense como aliado do réxime sionista. Os Estados Unidos deben de responder”, insistiu Abdolahian.

Hizbulá di que Israel terá un "castigo" polo ataque

Pola súa parte, o grupo xiíta libanés Hizbulá asegurou este martes que Israel recibirá un "castigo" pola morte de sete membros da Garda Revolucionaria no consulado iraniano en Damasco e encomiou o labor de "moitos anos" en apoio da Resistencia no Líbano por parte do xeneral Mohamed Reza Zahedi.

"Este crime indica que o inimigo israelí aínda cre estupidamente que eliminar líderes pode parar a onda firme por parte da xente da Resistencia. Sen dúbida, este crime non pasará sen que o inimigo reciba un castigo e unha vinganza", afirmou o movemento nun comunicado.

Hizbulá como parte desa alianza informal antiisraelí Eixo da Resistencia, capitaneada por Irán, e está encerellado en intenso fogo cruzado co Estado xudeu desde un día despois do inicio da guerra de Gaza o pasado outubro, mantendo unha fronte de apoio similar ao doutros membros da súa coalición.

Entre os falecidos na acción do luns está o destacado xeneral de brigada Mohamed Reza Zahedi, a quen a formación libanesa recoñeceu o seu labor de "moitos anos" en favor do "desenvolvemento e o progreso da Resistencia no Líbano".