Israel asegura que matou outro comandante de Hezbollah nun bombardeo en Beirut

O exército israelí asegurou este martes que as súas forzas aéreas mataron en Beirut outro comandante de Hezbollah, Suhail Husein Huseini, a última vítima dunha serie de ataques mortais contra dirixentes do movemento xiíta libanés, entre eles o que fora o seu máximo líder, Hassan Nasrallah.

Segundo dixo o portavoz para medios árabes do exército israelí en X, Avichay Adraee: "Avións caza levaron a cabo unha incursión precisa en Beirut e eliminaron o miliciano", sen especificar que día en concreto se produciu o ataque.

De acordo cun comunicado castrense, Huseini ocupábase do orzamento e a xestión loxística dos proxectos máis sensibles de Hezbollah, como a planificación de ataques desde Siria ou O Líbano, e do traspaso de armas entre Irán e a milicia-partido libanesa.

"Huseini foi responsable de distribuír armamento avanzado entre as unidades de Hezbollah, supervisando tanto o transporte como a asignación destas armas. Ademais, era membro do consello da Xihad, o consello de liderado militar superior (do grupo)", segundo o exército.

Israel xa asegurou o pasado 28 de setembro que liquidara "na súa totalidade" á cúpula militar do movemento xiíta libanés Hezbollah, tras o asasinato nun bombardeo masivo en Beirut do seu máximo líder Hassan Nasrallah e outros altos cargos, e dixo estar preparado para unha “escalada máis ampla” en caso dun ataque en represalia coordinado por Irán.

Días despois, o 1 de outubro, Irán lanzou uns 180 mísiles contra Israel como resposta aos asasinatos do líder de Hamas, Ismail Haniyeh, e de Nasrallah. Este foi o segundo ataque de Teherán, desde que o pasado mes de abril lanzara tamén mísiles e drons contra dúas bases aéreas israelís como resposta á morte de sete membros da Garda Revolucionaria no consulado iraniano de Damasco, nun ataque que non provocou grandes danos.

O exército israelí realizou o luns novos ataques en Beirut contra "obxectivos" pertencentes á sede de intelixencia de Hezbollah e bombardeou o sur do Líbano e a zona do Val da Beqaa, no leste do país, co fin de destruír infraestruturas.

Así mesmo, indicou ata as 23:00 da noite (21:00 GMT), que deterctara uns 190 proxectís disparados desde o Líbano contra Israel. No país veciño, máis de 2.000 libaneses morreron nestes ataques e 1,2 millóns foron forzosamente desprazados. 

Israel envía máis tropas ao Líbano

Israel tamén informou este martes de que a División Acoirazada 146 comezou onte a realizar "actividades operativas limitadas, localizadas e específicas" no suroeste do Líbano, sumándose a outras tres divisións que xa foran convocadas tras a invasión terrestre hai oito días.

Isto engade miles de militares adicionais á ofensiva terrestre de Israel, e segundo o diario Times of Israel, o número total de soldados despregados no Líbano podería xa superar os 15.000.

O exército israelí alerta da activación de sirenas antiaéreas no norte do país

O exército israelí informou este martes de que varias sirenas antiaéreas se activaron en distintas localizacións do norte de Israel, despois de que as forzas armadas do país intensificasen na véspera os seus ataques contra O Líbano e Gaza, no aniversario do ataque do grupo islamista palestino Hamas.

As sirenas soaron esta madrugada israelí en varios puntos do norte do país, entre eles Rosh HaNikra e Betzet, Kiryat Shmona e Kerem Ben Zimra, sinalaron as Forzas de Defensa de Israel (IDF, polas súas siglas en inglés) nun comunicado.

Horas antes, indicaron que identificaron varios proxectís cruzando desde O Líbano a territorio israelí, sen especificar danos.

O exército israelí indicou así mesmo que ata as 23:00 da noite do luns (21:00 GMT), aproximadamente 190 proxectís disparados por "terroristas de Hezbollah cruzaron desde O Líbano a Israel".

"As FDI continuarán operando contra a ameaza da organización terrorista Hezbollah en defensa do Estado de Israel e os seus residentes", engadiu.