Israel ataca o leste de Rafah e retoma as operacións na capital de Gaza
Israel ataca o leste de Rafah e retoma as operacións na capital de Gaza
"Ningún lugar é seguro na Franxa de Gaza e as condicións de vida son atroces", aseguran desde a UNRWA, a axencia das Nacións Unidas para os refuxiados palestinos
Biden pausa o envío de armas a Israel ata ver que fai en Rafah
![Mulleres en Rafah, onde Israel continúa coa súa ofensiva este venres (Reuters/Hatem Khaled)](https://img-g24-crtvg.flumotion.com/prog24/2024/20240510/Gaza-Rafah-ReutersHatemKhaled.png)
O Exército israelí mantén este venres operacións que cualificou como "precisas" na parte leste de Rafah, onde o luns pasado ordenou a evacuación dos civís. Ademais retomou a súa actividade militar en Zeitun, barrio da cidade de Gaza, onde aseguran que efectivos de Hamas volveron tomar posicións na zona.
As tropas israelís din que localizaron en Rafah máis dunha decena de túneles subterráneos e no lado palestino do cruzamento de Rafah -que conecta o enclave con Exipto- "eliminaron varias células terroristas en combates corpo a corpo e con ataques aéreos".
Israel comezou o luns a operación en Rafah, aínda que insiste en que se trata de redadas selectivas na parte leste de esa cidade, no extremo meridional da Franxa e onde viven uns 1,5 millóns de desprazados, máis da metade da poboación gazatí.
O Exército israelí ordenou o luns a evacuación dunhas 100.000 persoas desa parte leste de Rafah e xa o martes tomou o control do cruzamento de Rafah, que conecta o enclave con Exipto e é vital para a entrada de axuda humanitaria. Ao mesmo tempo intensificaba os bombardeos nesa área.
Desde entón, evacuáronse unhas 150.000 persoas, segundo datos do Exército, aínda que a UNRWA rebaixa esa cifra a uns 110.000 palestinos desprazados do leste de Rafah de novo pola violencia, sen un lugar seguro ao que ir.
"A medida que se intensifican os bombardeos das forzas israelís en Rafah, continúan os desprazamentos forzados. Estímase que unhas 110.000 persoas fuxiron de Rafah en busca de seguridade. Pero ningún lugar é seguro na Franxa de Gaza e as condicións de vida son atroces", lamentou a UNRWA.
Sobre a continuación das operacións en Zeitun, na metade norte da Franxa, o Exército israelí indicou que os seus avións atacaron a combatentes e infraestrutura de Hamas, incluída unha instalación con "gran cantidade de explosivos".
A axencia oficial palestina Wafa reportou bombardeos israelís tanto en varios puntos de Rafah, como no barrio de Zeitun e o campamento Shati, en cidade de Gaza, causando vítimas mortais.
En sete meses de guerra, máis de 34.900 gazatís morreron, incluído 15.000 nenos; mentres que uns 10.000 corpos permanecen desaparecidos baixo os restos dos bombardeos.