Israel recupera na Franxa de Gaza os cadáveres de seis reféns do 7 de outubro

Os kibutz de Nirim e Nir Oz anunciaron este martes o rescate dos cadáveres de cinco reféns secuestrados no ataque de Hamas do 7 de outubro, información que máis tarde confirmaron as autoridades israelís, que elevaban a seis os corpos recuperados.

Os cativos cuxos restos foron rescatados son Yagev Buchshtab, Alexander Dancyg, Avraham Munder, Yoram Metzger, Nadav Popplewell e Haim Perri, segundo informou o Exército israelí, que levou a cabo a operación xunto coa axencia de intelixencia Shin Bet.

"O Estado de Israel seguirá facendo todos os esforzos posibles para devolver a todos os nosos secuestrados, tanto vivos como mortos", indicou nun comunicado o primeiro ministro israelí, Benjamín Netanyahu.

"A operación foi posible grazas á información precisa do Shin Bet e das unidades de intelixencia das Forzas de Defensa de Israel (FDI) e o Cuartel Xeral de Reféns da Dirección de Intelixencia das FDI", indicaron os corpos de seguridade hebreos nun comunicado conxunto.

O Exército explicou que tras atopar durante a noite os corpos dos reféns nos túneles de Jan Yunis, os seus restos foron identificados polo Instituto Nacional de Medicina Forense e a Policía de Israel, que inmediatamente informaron as familias.

Co rescate destes corpos, dos 251 secuestrados o 7 de outubro, quedan dentro da Franxa 105 reféns, dos que 34 estarían confirmados mortos; mentres que se recuperaron e levado de volta a Israel os cadáveres de 30 secuestrados.

Ademais, 116 cativos saíron con vida da Franxa, a maioría no único acordo de tregua dunha semana o pasado novembro ademais de sete rescatados en operacións militares do Exército.

A comunidade internacional afánase por lograr outro acordo de cesamento do fogo, que permita a liberación do resto de reféns, e con ese fin está de visita en Israel o secretario de Estado dos EUA, Antony Blinken, quen o luns pola noite adiantou que Netanyahu aceptou a nova proposta de acordo e instou a Hamas a facer o mesmo. Aínda que o grupo mostrou as súas reticencias cara a este novo borrador que, segundo din, serve ás esixencias de Israel.