Italia excarcera o iraniano buscado polos EUA tras a liberación de Cecilia Salga
Italia excarcera o iraniano buscado polos EUA tras a liberación de Cecilia Salga
A xornalista italiana estaba presa en Irán dende o 19 de decembro e foi liberada pouco despois do encontro entre Meloni e Trump
Cecilia Salga á súa chegada a Roma o pasado 8 de xaneiro. Filippo Attili vía REUTERS
O enxeñeiro iraniano Mohammad Abedini, arrestado en Italia desde o 16 de decembro por unha orde de detención dos EUA, saíu este domingo do cárcere, catro días despois da liberación da xornalista Cecilia Salga en Irán, onde permanecía en prisión.
O ministro de Xustiza italiano, Giancarlo Nordio, depositou este domingo no tribunal de Apelación de Milán a petición para revogar a detención de Abedini, acusado polos Estados Unidos de proporcionar compoñentes de drons á Garda Revolucionaria de Irán.
Poucas horas despois, como confirmou o avogado aos medios italianos, o enxeñeiro "era un home libre" e saíu do cárcere de Ópera, en Milán, e posiblemente regresará este mesmo domingo ao seu país de orixe, malia residir en Suíza no momento da súa detención.
Nunha nota, o ministro considera que en virtude dos acordos entre os EUA e Italia, a extradición "só pode concederse por delitos punibles conforme as leis de ambas as partes contratantes, condición que, tal e como están as cousas, non pode considerarse que exista".
Alega que a acusación dos Estados Unidos ao iraniano de "conspiración", "non corresponde aos casos previstos e castigados polo sistema penal italiano".
Así mesmo, Italia apunta que "non se presentou ningún elemento que fundamente as acusacións formuladas" de "conspiración para proporcionar apoio material a unha organización terrorista con resultado de morte" e de "subministración e intento de subministración de apoio material".
Intento de presión
Para a maioría de analistas, era evidente que Irán detivera a xornalista italiana como intento de presión a Italia para conseguir a liberación do iraniano.
Cecilia Salga foi arrestada e encarcerada o 19 de decembro por unha xenérica acusación de "violar as leis da República Islámica de Irán", segundo un comunicado do departamento xeral de medios estranxeiros do Ministerio de Cultura, e foi liberada o 8 de xaneiro.
A liberación chegou tamén tras a viaxe que a primeira ministra, Giorgia Meloni, realizou por sorpresa para reunirse co presidente electo dos Estados Unidos, Donald Trump.
