Lamine Yamal e Nico Williams, a xuventude ao poder
Lamine Yamal e Nico Williams, a xuventude ao poder
España acaparou os galardóns individuais, con Rodri como mellor xogador do torneo, Williams o MVP da final, Yamal o mellor novo e Olmo o máximo goleador
![](https://img-g24-crtvg.flumotion.com/prog24/2024/20240714/b13fbab9657bb6816c48ff7a2229ffec1624288d.jpg)
Dentro do triunfo do bloque e da familia que construíu a selección española houbo varios nomes propios na vitoria da Eurocopa. Por riba do resto, esta será a Euro de Lamine Yamal e Nico Williams. Yamal festexou o dezasete aniversario e Williams os 22 anos.
O descaro do xuvenil do Barcelona causa sensación en Europa. Titular indiscutible, asistente a Williams na final e autor dun golazo nas semifinais ante Francia. A súa sociedade co extremo do Athletic dentro e fóra do campo será lembrada. Nico Williams marcou na final o primeiro gol e foi considerado o mellor xogador do encontro. Completou un campionato excepcional e os mellores equipos do mundo peléxanse por telo nas súas filas.
Tamén será o campionato de Rodri. O mediocentro do City, sen o brillo doutros compañeiros pero sempre con efectividade, recibiu o premio ao mellor xogador do torneo. Tivo que retirarse lesionado na final, pero en todos os partidos exhibiu unha regularidade e un mando que resultaron fundamentais no camiño da selección.
E engadimos o mellor goleador, non en solitario, que levou Dani Olmo. Partía como o xogador número doce e aproveitou a baixa por lesión de Pedri. Anotou tres goles e tamén pasará á historia pola súa grande Eurocopa.
A clave foi o bloque. Dez goleadores distintos que marcaron os quince de España. Sete vitorias en sete partidos. Uns números que están ao alcance de moi poucos equipos na historia deste torneo.