Os menos habituais do Celta cumpren co trámite do San Pedro

Claudio aproveitou o trámite copeiro para darlles minutos aos menos habituais. Miguel Román estreouse como titular co primeiro equipo e Fer López xogou toda a segunda parte. Xogadores como Aidoo, Ristic ou Cervi tiveron minutos para coller ritmo e Allende saíu como suplente e marcou un dos goles. 

Aos catro minutos xa gañaban os vigueses cun gol de Alfon. Sorprendeu o San Pedro cando empatou no quince cun golazo espectacular de Domínguez. Pero só lle durou tres minutos a alegría ao conxunto andaluz porque Pablo Durán estivo moi certeiro nun lanzamento de falta. 

A nova negativa do partido foi a lesión de Sergio Carreira á media hora. No seu lugar entrou Tadeo Allende, que conseguiu marcar o terceiro xusto antes do descanso. Na segunda parte, coa eliminatoria decidida, chegou o cuarto gol, marcado por Douvikas, ao que agasallou Alfon cunha boa asistencia. O grego repetiu a pouco do final nunha xogada que iniciou o da canteira Fer López e mantén a boa sintonía coa Copa que comezou a campaña anterior.